Азербайжаны нийслэл Баку хотод буудлага спортын дэлхийн аварга шалгаруулах тэмцээн эхэллээ. 54 дэх удаагийн энэ тэмцээнд 101 орны 1249 тамирчин оролцож байгаа бол манай улсаас дасгалжуулагч Л.Ундралбат, Ж.Ганхуяг, Б.Сугар, Д.Лхагвадорж нарын удирдлага дор 16 тамирчин цэц мэргэнээ сорих юм.

Олимпын урд жилийн буучдын хамгийн өргөн цугларалтад монголоос эрэгтэйчүүдийн ангилалд Ц.Мөнх-Эрдэнэ, С.Дэлгэрхангай, Н.Баяраа, Д.Лхагвасүрэн, Б.Эрхэмбаяр, Э.Даваахүү, П.Тэргэл нар эх орноо төлөөлөн өрсөлдөнө.

Эднээс Н.Баяраа хамгийн туршлагатай нь бол залуу тамирчин П.Тэргэлийн хувьд насанд хүрэгчдийн галын шугамд анх удаа цэц шалгах аж.

Харин эмэгтэйчүүдийн ангилалд Хөдөлмөрийн баатар, гавьяат тамирчин О.Гүндэгмаа , Ч.Нарантуяа, О.Янжиндулам, Г.Нандинзаяа, О.Есүгэн, Т.Баярмаа, Т.Баярцэцэг, Э.Хишигдэлгэр, Ц.Анударь нар цэц мэргэнээ сорино. Эмэгтэй тамирчдаас бол хүлээлт их байгаа. Хамгийн ахмад нь болох 45 настай О.Гүндэгмаа ДАШТ-д хамгийн олон оролцсон монгол тамирчин. 

Энэхүү тэмцээнээс Монголын буучид иж бүрдэл медальтай. Хамгийн өндөр амжилтыг гавьяат тамирчин Д.Мөнхбаяр 1998 онд ганцаарчилсан анхны алтан медалийг хүртсэн бөгөөд 2002 онд дахин түрүүлсэн билээ.  Хөдөлмөрийн баатар О.Гүндэгмаа 2006 онд хүрэл медаль хүртсэн бөгөөд тэр жилийн багийн төрөлд Д.Мөнхбаяр, О.Гүндэгмаа, Д.Оюун нар хүрэл медаль хүртсэн нь анхны багийн медаль байв. Үүнээс найман жилийн дараа О.Гүндэгмаа, Ц.Мөнхзул, Т.Баярцэцэг нар багийн төрөлд мөнгөн медаль хүртэж, медалийн өнгийг өөрчилсөн юм. Харин өнгөрсөн жил Э.Даваахүү, Ц.Мөнхзул нар холимог хосын төрөлд мөнгөн медаль хүртсэн билээ.

А.Болд