Сайд гүтгүүлжээ. Эрвийх дэрвийхээрээ /өөрийнх нь хэлснээр/ зүтгэж байгаа сайдыгаа их муухай гүтгэж. Энэ бүхэн түүнийг ухаантай төрсөнд нь хорсож, улсын оройд гарахаас нь эмээн, атаархаж байгаа хүмүүсийн зохион байгуулалттай хэрэг гэдгийг  судлаачид нотолжээ. Тухайлбал түүний нэг агуулгатай мэдээг 10-20 янзаар гарчгийг нь солиод өдөр тутмын сайтуудаар тавьсан байна. Үүнийг судлаачид тогтоож. Орчин үеийн судлаачид салбар биш сайт судалдаг болж дээ.

Хөгжлийн бэрхшээлтэй иргэдийн байрыг сайд булааж аваагүй. Угаасаа энэ байранд улсаас нэг ч төгрөг гаргаагүй. Барилга барьсан компани нь түүний зөвлөхийнх байсан нь зүгээр л тохиолдол гээд ойлгочих. Барилгын гуравны нэгийг хөгжлийн бэрхшээлтэй иргэдийн “Төгс-Эрдэм” ТББ авсан. Харин үлдсэн хэсэгт нь бизнесийн зарчмаар үйл ажиллагаа явуулж байгаа нь яагаад шударга биш гэж. Барилга нь баригдах явцдаа хөгжлийн бэрхшээлтэй иргэдийн сургалтын төв гэсэн хайрлам сайхан хаягтай байсан. Харин баригдсан хойноо ихэнхи талбай нь хувийнх болж таарсан. Үүнээс бид суралцах ёстой. Тухайлбал хотын даргын захирамжаар нийгмийн үйлчилгээний зориулалтаар А зэрэглэлийн бүсэд олгосон газар дээр арван давхар барилга барьж болно. Барилгынхаа гадаа энд цэцэрлэг баригдаж байна гээд нэг л сайхан самбар өлгөчихнө. Баригдсан хойноо арван давхар цэцэрлэг байгуулж тэнэгтэж болохгүй, нэг хоёр давхарт нь байгуулсан болоод л үлдсэн хэсэгтээ сайхан бизнес явуулж байх жишээний. А зэрэглэлд, барилгаасаа хэд дахин үнэ цэнэтэй газрын асуудлыг хэн ч ярихгүй. Хүрээд ирэхэд нь “хувийн өмч шүү дээ маанаг аа, улсаас ямар мөнгө гаргасан юм” гээд сууж байхад болно. Ингэж босгосон байшиндаа ардчилсан хүчээ, шонхороо ер нь юугаа оруулна уу? Өөрийн дур.

Сайдыг сагсан бөмбөгийн холбоотой холбож мөн ч их гүтгэж. Сагсан бөмбөг нэг л удаан хөгжөөд байхаар нь сайд маань шууд л Үндэсний сагсан бөмбөгийн холбоо гэж тусдаа байгууллага байгуулсан байна шүү дээ. Хоёр сагсан бөмбөгийн холбоо нийлж хуралдаад мандат тараагаад ардчилсан зарчмаар сонгууль явуулжээ. Сонгуульд нэг талаас сагсан бөмбөгт сэтгэлгүй этгээд, нөгөө талаас сагсан бөмбөгт сэтгэлтэй сайд нар өрсөлдөжээ. Ингээд сагсан бөмбөгт сэтгэлгүй этгээд 60 орчим хувийн саналаар ялалт байгуулжээ. Харин сагсан бөмбөгт сэтгэлтэй сайд маань ялагдчихаад баахан мандатны хэрүүл хийгээд хурлыг орхиод гарсан гэдэг. Сагсан бөмбөгт сэтгэлгүй хүмүүстэй хамтарч ажиллахгүй гэсээр сайдын холбоо салган тусгаарлагч хэвээр үлдэх нь тэр. Сагсан бөмбөгт сэтгэлтэй сайдыг ерөнхийлөгч болтол нь тэмцэл үргэлжлэх шинжтэй. Энд олонхийн санал, нээлттэй ардчилсан зарчим ер яригдахгүй, ерөөсөө сэтгэлтэй юу, сэтгэлгүй юу гэдэг л асуудал яригдах ёстой аж. Энэ мэтээр С.Эрдэнэ сайдыг их муухайгаар удтал гүтгэж байгааг судлаачид тогтоогоод байгаа юм байна.

                                                                                                                                                 Цагариг