Ардчилсан хувьсгалын үнэр үнэртсэн энэ жилийн наадмын сонин хачин амнаас ам дамжин яригдсаар байна. Сүр дуулиант наадмын нээлтэд “Хонхны дуу” эгшиглэж, бяр тэнхээт бөхчүүд нь нэгийн даваанаасаа эхлээд түнжин хагарсан гээд яриад байвал сонин их ээ. За тэр ч яахав болдог юм болдогоороо болоод “өнгөрсөн хорвоо”.

Түүнээс илүүтэй өнөө жилийн наадам хэтэрхий үрэлгэн боллоо гэх шүүмжлэл иргэдийн дунд байна. Энэ жилийн Үндэсний их баяр наадмыг 2,2 тэрбум төгрөгөөр тэмдэглэсэн гэж байгаа. Өнгөрсөн жил наадам зохион байгуулах нийт зардал 1,3 тэрбум төгрөг байсан бол энэ жилийн хувьд даруй 900 сая төгрөгөөр өссөн үзүүлэлттэй харагдаж байна. Хэмнэлт хийхийг уриалаад байсан засаг ийнхүү наадамд үрэлгэн хандсанаа валютын ханш өссөнтэй холбон тайлбарлаж байв.

Наадмын нийт зардлын задаргааг танилцуулъя.

- Урлаг соёл хүндэтгэлийн арга хэмжээний зардал - 946 сая төгрөг буюу 42,8 хувь
- Бай шагналын зардал - 291,2 сая төгрөг буюу 13,1 хувь
- Тохижилт, үйлчилгээний зардал - 494 сая төгрөг буюу 22,4 хувь
- Хэв журам хангах, онцгой байдлын зардал - 142,5 сая төгрөг буюу 6,4 хувь
- Зохион байгуулах бусад арга хэмжээний зардал -333,9 сая төгрөг буюу 15,1 хувь

Урлаг соёлын арга хэмжээ гэдэг нь Со гавьяатын найруулсан наадмын нээлт болоод Чингисийн талбайг хоёр өдөр доргиосон шоу тоглолтыг хэлээд байгаа бололтой. Зарим эх сурвалжийн мэдээлснээр 11-ний орой болсон 3D лазер шоунд дээрх 946 сая төгрөгний 500 сая нь явчихсан гэх.
Ингээд бодохоор бид төв талбайдаа хоёр өдөр шоудаад л тэрбум орчим төгрөгийг салхинд хийсгэчихсэн байгаа юм. Гэтэл манайх гэдэг улс хэзээ мөдгүй модоо барих дээрээ тулчихаад, 100 хоногийн төлөвлөгөө гээчийг хэрэгжүүлж байгаа биш үү?

Эхний хагас жилийн байдлаар төсвийн алдагдал 240 тэрбумд хүрч, төгрөгийн ам.доллартай харьцах ханш жилийн өмнөхөөс 26,9 хувиар нэмэгдсэн. Долларын ханш 1840 шахаж яваа гээд олон тоо баримт улсын маань эдийн засаг ямархуу түвшинд байгааг дор нь хэлээд өгнө. Хэрэв энэ байдал үргэлжилбэл ирэх намраас манай улс цалин, тэтгэвэрээ тавьж чадахгүйд хүрэхийг ч зарим эдийн засагчид хэлж байгаа. Ийм үед энэ их мөнгөөр "шоудах" хэрэг байсан уу?

Тэвчиж болох зардал гэж их ярьдаг. Тэгвэл найр наадам, шоу цэнгээнийг л тэвчих ёстой баймаар. Ард түмэн нэг өдөр тоглолт үзсэн ч яалаа байсан ч яалаа. Эрх биш чихрээ голсон хүүхэд шиг шоу тоглолт үзүүлсэнгүй гэж урвайж унжийхгүй нь лав шүү дээ.