Засгийн газраас эрүүгийн хуулийн шинэчилсэн найруулга буюу “Гэмт хэргийн тухай” хуулийн төслийг УИХ-д өргөн бариад байгаа. Хууль зүйн сайд Х.Тэмүүжин автортай энэхүү хуулийн төсөл нь өмнөх хуулиа бодвол илүү уян хатан, нарийвчлалтай, хорих ялыг багасгасан, товчхондоо шоронжсон системийг халах зорилготой хийгдсэн гэж хууль санаачлагчид тайлбарладаг. Харин уг хуулийн төсөлтэй холбогдуулж ихээхэн маргаан өрнөөд байгаа. Тухайлбал уг хуулийг хамгийн их эсэргүүцэж буй хүмүүсийн нэг бол Монгол Улсын гавьяат хуульч, академич С.Нарангэрэл юм.

Тэрээр саяхан хэвлэлд өгсөн ярилцлагадаа “Хэрвээ энэ хуулийн төсөл батлагдвал Товчхондоо Монгол Улс сүйрлийн байдалд орно. Учир нь одоо 14-16 насны хүүхдүүдэд 8 төрлийн хэрэгт хариуцлага хүлээлгэж байгаа. Харин энэ төслөөр бол 14 нас хүрсэн л бол Монгол Улсын эрүүгийн хуульд заасан 300 гаруй хэрэгт хамруулан шийтгэх, хорих заалт орж байгаа юм. Тэгэхээр Монгол Улсад хуулиараа гэмт хэргийг нэмэгдүүлнэ гэсэн үг. Мөн энэ хуульд шүүгчийн үзэмжээр хэрэг шийдвэрлэх тал давамгайлж байна. Шүүгч юу л гэж үзнэ, түүгээр шийднэ. Өөрөөр хэлбэл шүүгч хэрэг мөн гэвэл мөн, биш гэвэл биш гэх хэлбэрээр ажил явах нь. Энэ нь бодит байдал дээр улстөрийн эсвэл бусад байдалд ч нөлөөлөх талтай. Иргэн бүр ноцтой гэмт хэрэгтэн болж хувирах субьектив хувилбарын хуулиуд зонхилсон гэдгийг би шүүмжилсээр байгаа... Сэтгүүлч жирийн иргэн байж байгаад шударга бус хахуультай тэмцэх зорилгоор ямар нэг обьектийн зургийг аваад ил болгосон байж болно. Гэтэл энэ тохиолдолд зөвшөөрөлгүйгээр зураг авсан гээд шоронд хийхээр хуулийн төсөл бэлтгэгдсэн байна. Ялангуяа сэтгүүлчид хэвийн ажлаа явуулах боломжгүй болно. Захиргааны зөрчил болгоныг гэмт хэрэгт тооцоод, нэмээд насыг нь доошлуулаад ирэхээр улам хатуу тэр дундаа одоогийнхоос хатуу харгис хууль болж байгаа юм” гэж өөрийн байр сууриа илэрхийлжээ.

УИХ-ын ээлжит чуулган эхэлмэгц  “Гэмт хэргийн тухай” хуулийг хэлэлцэж эхэлнэ. Харин уг хуулийн төсөл тийм ч амархан батлагдахгүй, нэлээд маргаан мэтгэлцээн дагуулах нь тодорхой болж байна.