Өнөөдөр Н.Алтанхуягийн тэргүүлсэн “Шинэчлэлийн” Засгийн газар хоёр нас хүрч байна. Өдгөөгөөс хоёр жилийн өмнө буюу 2012 оны наймдугаар сарын 09-ний өдөр УИХ-ын чуулганы хуралдаанаар Н.Алтанхуягийг Монгол Улсын 27-дахь Ерөнхий сайдаар томилсон юм. Хуралдаанд 58 гишүүн оролцож 16 гишүүн түүний дэмжээгүй бол 42 нь буюу 72.4 хувь нь түүнийг дэмжсэн байна. Тэрээр Ерөнхий сайдаар тохоон томилогдсоныхоо дараа УИХ-ын индэрээс нийт ард түмэндээ хандаж хэлсэн үгэндээ

“Миний бие энэ цаг үеийг монгол хүн монголдоо сайхан амьдрах боломжийг бүрдүүлэх хамгийн тохиромжтой, алдаж болохгүй агшин гэж харж байна. Энэ агшинд монголын төр хүчирхэг байж, ард түмний үүрэг болгосон шинэчлэл өөрчлөлтийг хийсэн шиг хийх хэрэгтэй. Төр хүчирхэг байнаа гэдэг нь аливаа албан тушаалтан ард иргэддээ төмөр нүүр гаргаж, хүнд суртлаар далайлгахыг хэлэхгүй ээ...

Эсвэл төсвийг тонож, санга цөлмөхийг бас ойлгохгүй ээ. Харин төр хүчирхэг байнаа гэдэг ард түмний өмнө амласнаа ажлаараа биелүүлж харуулдаг, бага зардлаар их үр ашгийг бүтээдэг, авлига хүнд суртлын аранга байдаг, чиг үүрэг нь тодорхой, үйл ажиллагаа нь шуурхай байхыг ойлгож байгаа юмаа...

Авлигалын үнэр шингэж, ад хор шүгэлсэн хэнийг ч болов монголын төр хоймортоо ч байтугай хатавчиндаа л суулгах ёсгүй ээ. Ардчилсан засаг авлигалын аранга байх болноо...

Ард түмэн та биднээс зоримог шийдэл, бодитой шинэчлэл, өөрчлөлтийг хүлээж байна. Өдөр өнгөрөөсөн, аргацааж хуурсан, ядмаг аргыг тэд бас хүсэхгүй л байна шүү... ” гэдгийн онцолж байв.

Ямартай ч түүний Засгийн газар хоёр нас хүрч байна. Харин хоёр жилийн хугацаанд түүний Засгийн газар ямар үр дүнтэй ажилласан, Монголчуудын амьдрал хэрхэн дээшилсэн талаар ард иргэд дор бүрнээ дүгнэлт хийж байгаа бизээ.