Газар дундын тэнгист, Киприйн арлын хойд эргээс холгүй зорчигч тээврийн гатлага онгоц хөмөрч, наад зах нь найман хүн амиа алдаж, 18 хүн сураггүй болоод байна. Ослын дараа томоохон хэмжээний эрэн хайх, аврах ажиллагааг эхлүүлжээ. Ослын үед 267 хүн, түүний дотор найман багийн гишүүнтэй байсан тус онгоц Умард Киприйн Кирения боомтоос Туркийн Мерсин мужийн Ташүжү боомтыг чиглэн хөдөлжээ. Гэвч хөдөлснөөсөө ердөө 15 минутын дараа ус авч эхэлсэн байна.
Одоогоор 241 хүнийг аварсан бөгөөд амь үрэгдсэн найман хүний дөрвийнх нь цогцсыг таньж тогтоогоод байна. Сураггүй болсон 18 хүнийг олохоор ажиллагаа үргэлжилж байгаа аж. Аврагдсан зорчигчдын зарим нь онгоц усанд живэхийн өмнө хэвийн бус хөдөлгөөн хийж, усны гадаргад хүчтэй цохигдож байсан талаар ярьжээ. Мөн хөлгийн урд хэсэгт хүчтэй дуу чимээ гарсны дараа ус орж эхэлсэн гэж зарим гэрч мэдээлсэн байна. Гэхдээ ослын яг шалтгаан одоогоор албан ёсоор тогтоогдоогүй байна.
Ослын дараа гатлага онгоц 514 метрийн гүнд бүрэн живсэн нь усан доорх эрэн хайх ажиллагааг ихээхэн хүндрүүлж байна. Турк болон Умард Киприйн эргийн хамгаалалтын хөлөг онгоц, нисдэг тэрэг, нисгэгчгүй төхөөрөмжүүдийг дайчилжээ.
Ослын шалтгааныг тогтоохоор ахмад болон долоон багийн гишүүнийг цагдаагийн байгууллага саатуулан шалгаж эхэлсэн байна. Зорчигчдын зарим нь багийнхан аюулын талаар өгсөн анхааруулгыг үл тоосон, тэр байтугай хөлгийн хаалга түгжээтэй байсан гэх мэдээлэл өгчээ. Эдгээр нь одоогоор шалгагдаж буй мэдүүлэг бөгөөд ослын албан ёсны шалтгаан гэж үзээгүй байна.
Умард Киприйн удирдагч Туфан Эрхүрман уг ослыг Киприйн түүхэн дэх хамгийн ноцтой далайн ослуудын нэг хэмээн тодорхойлжээ. Мөн тус бүс нутагт гурван өдрийн гашуудал зарласан байна.
Туркийн Ерөнхийлөгч Режеп Тайип Эрдоган эрэн хайх, аврах ажиллагаанд шаардлагатай бүх нөөцийг дайчилсан гэж мэдэгдсэн бол Бүгд Найрамдах Кипр Улсын Засгийн газар шаардлагатай тусламж үзүүлэхэд бэлэн байгаагаа илэрхийлжээ. Эрэн хайх ажиллагаа одоо ч үргэлжилж байгаа бөгөөд сураггүй болсон 18 хүнийг олох нь аврах багийн нэн тэргүүний зорилт болоод байна.
Л.Баяр
