АНУ-ын Аляскад өссөн София Ли 13 настайдаа анхны бие даасан аяллаа хийж, түүнээс хойш дэлхийн улс орнуудыг тойрон аялах амьдралаар замнажээ. Тэрбээр одоо дэлхийн бүх улсад очсон хамгийн залуу хүн болох Гиннесийн дэлхийн рекордыг шинэчлэх зорилготой байна. 

Ли 13 настайдаа Коста Рика руу ганцаараа аялсан нь түүний амьдралыг өөрчилсөн байна. Тэр аяллын дараа өөр өөр улс, соёлтой танилцах хүсэл нь улам нэмэгдэж, 17 насандаа дэлхийн 195 улсад хүрэх зорилгоо нухацтай хэрэгжүүлж эхэлжээ. Тухайн үед тэр НҮБ-аар хүлээн зөвшөөрөгдсөн 195 улсын 50 гаруйд нь аль хэдийн очсон байв.

Гэвч бүх улсад очсон гэхэд зөвхөн хил давах нь хангалтгүй. Гиннесийн рекордод аяллаа баталгаажуулахын тулд нарийн нотлох баримт, урьдчилсан төлөвлөлт, маршрутын бүртгэл шаардлагатай байдаг аж. Тиймээс Ли өмнө нь очсон олон орондоо дахин аялж, шаардлагатай нотлох баримтуудаа цуглуулжээ. 

2026 оны хавар Ли 180 улсад очоод байсан бөгөөд тухайн үеийн рекордыг эзэмшигч Лекси Алфорд 21 нас 177 хоногтойдоо дэлхийн бүх улсад очсон хамгийн залуу хүн болсон байжээ. Ли энэ амжилтыг өөрийн 21 насны төрсөн өдрөөс хойш хэдэн сарын дотор шинэчлэх боломжтой байсан юм.

Түүний аяллын хамгийн сүүлийн хэсэг хамгийн хүнд сорилтуудын нэг болжээ. Судан, Иран зэрэг улс руу нэвтрэхийн тулд виз, аюулгүй байдал, нислэг болон хил нэвтрэх нөхцөлийг маш нарийн тооцох шаардлагатай байв.

Ли мөн Афганистан, Сомали, Гаити зэрэг аялал жуулчлалын хувьд эрсдэлтэй орнуудаар аялсан байна. Тэрбээр улс бүрийг зүгээр нэг “тоолж” өнгөрөхийг хүсдэггүй. Үндэсний хоолыг нь идэж, хүмүүстэй уулзаж, түүх, соёлын дурсгалт газартай танилцах зэрэг тухайн орныг мэдрэхүйц туршлага хуримтлуулахыг зорьдог байна. 

Лигийн хамгийн дуртай улс нь Энэтхэг бөгөөд таван удаа очжээ. Харин дэлхийг тойрон аялсан долоон жилийн хугацаандаа сургуулийн энгийн амьдрал, найз нөхөд, гэр бүлийн олон үйл явдлыг орхигдуулсан нь аяллынх нь хамгийн хүнд талуудын нэг болсон байна.

Гэсэн ч София Ли энэ аяллыг зөвхөн рекорд тогтоохын төлөө хийж байгаа зүйл биш гэж хэлдэг. Түүний хувьд дэлхийн өөр өөр орны хүмүүс хоорондоо ялгаатай хэдий ч хүнлэг чанар, сайхан сэтгэлээрээ ижил гэдгийг өөрийн аяллаар харуулах нь илүү чухал аж.

Л.Баяр