Өнгөрсөн бямба гариг буюу энэ сарын 9-нд П.Н.Шастины Нэрэмжит Улсын Гуравдугаар Төв Эмнэлгийн сувилагч бүсгүй ажил дээрээ нэгэн залуугийн хамт хутгалуулсан ноцтой хэрэг гарлаа. Тодруулбал, тэр өдрийн өглөөний 07:40 цагийн үед тус эмнэлэг рүү гаднаас хутга, заазуур барьсан нэгэн залуу орж ирж, таван давхарт байрлах “Уушиг судлалын тасаг” руу явж орон ажлаа хийгээд зогсож байсан 29 настай Б гэх сувилагч бүсгүй болон түүнийг хамгаалахаар ирсэн залуугийн хүзүүн тус газар хутгалж хүнд гэмтээжээ.

 Ингээд ч зогсохгүй хажуугийн өрөөнд байсан бас нэгэн сувилагч бүсгүй рүү хутгаа барин дайрсан боловч сувилагч бүсгүй биеэ хамгаалж чадсан байна. Ингээд хутга барин улангасан дайрч байгаа залууг газар унагаан, хутгыг нь булааж авч чадсан бөгөөд цагдаагийнхан шуурхай ирэн түүнийг авч явжээ. 

  Одоо хохирогч Б ГССҮТ-д маш хүнд байдалтай хэвтэн эмчлүүлж байгаа юм байна.  Харин хамгаалах гэж байгаад хутганд өртсөн залуу Улсын клиникийн гуравдугаар эмнэлгийн Ерөнхий мэс заслын тасагт хэвтэн эмчлүүлж байгаа юм билээ.

 Энэ хэрэг гарахын өмнөх өдөр өнөөх хутга барьж дайрсан залуу ээжийгээ тус эмнэлгийн уушигны тасагт хэвтүүлнэ хэмээн авчирчээ. Гэтэл сувилагч бүсгүй Б “Ор байхгүй.Одоогоор хэвтүүлэх боломжгүй байна” гэх хариулт өгсөн юм байна. Үүнд нь бухимдсан өнөөх залуу өдөржин эмнэлэг дээр хэл ам хийж, өвчтөнүүдийн амгалан тайван байдал алдагдуулаад байсан тул сувилагч Б Баянгол дүүргийн цагдаагийнханд мэдэгдэж, түүнийг баривчлуулсан аж. Харин өнөөх залуу тэр өдөртөө суллагдаад, маргааш өглөө нь энэ аймшигт үйлдлээ хийсэн байна.

 Юутай ч өвчтөнүүдийн биеийн байдал хэр байгааг тодруулахаар "Шастины нэрэмжит Улсын гуравдугаар эмнэлэг"-ийг зориход хоёр өвчтөн хоёулаа тус эмнэлэгт хэвтэн эмчлүүлж байгаа. Одоогоор тодорхой мэдээлэл өгмөөргүй байна гэх хариуг холбогдох албан тушаалтан өглөө.

 Хэргийн талаар ЦЕГ-ын хэвлэл мэдээллийн төвийн ажилтан, цагдаагийн ахмал Ё.Лхагвасүрэнгээс тодруулахад "2014 оны наймдугаар сарын 8-ны өдөр Баянгол дүүргийн 5 дугаар хороо Гуравдугаар эмнэлэгт бусдад хутгалуулсан хүн байна гэж өргөдөл гаргаж ирсэний дагуу цагдаагийн байгууллага шалгалтын ажиллагааг хийсэн. Ингээд шалгалтын ажиллагааг хийхэд Баянгол дүүргийн 2 дугаар хороонд оршин суух 26 настай эмэгтэй Э, мөн дахин 24 настай эрэгтэй нарыг мэсний зүйлээр шархдуулж, танхайрсан байсан. Энэ гэмт этгээдийг илрүүлэн Баянгол дүүргийн хоёрдугаар хэлтэс дээр шалгалтын ажиллагааг явуулж байна. Тухайн этгээдийн хувьд Сонгинохайрхан дүүргийн 25 дугаар хороонд оршин суух 29 настай эрэгтэй Г гэгч юм. Хэрвээ иргэн төрийн байгууллага ямарваа нэгэн газар очоод үйлчилгээний талаар гомдол саналтай байгаа бол хуулийн дагуу хандах ёстой. Түүнээс биш танхайрч, бусдын эрүүл мэндэд халдах ёс байхгүй. Үүнд эрүүгийн хариуцлага хүлээлгэнэ. Эрүүгийн хуулийн 181 дүгээр зүйл буюу Танхайрах төрлийн гэмт хэргийн зүйл ангиар шалгаж байна" гэв.

Д.Ундрах /24tsag.mn/