Энэ сарын 8-ний өдрийг “Аавуудын өдөр” хэмээн нэрийдэж, үүнтэй холбоотойгоор нийслэл Улаанбаатар хотын хэмжээнд архидан согтуурах, согтуугаар тээврийн хэрэгсэл жолоодох зөрчил нэлээд гарсан байна. Тиймээс Нийслэлийн замын цагдаагийн зүгээс “Согтуу” нэртэй арга хэмжээг зохион байгуулсан аж. Улмаар 145 согтуу жолооч замын хөдөлгөөнд оролцож  байсныг илрүүлжээ.

Энэ өдөр шөнийн 00.00 цагийн үед Сонгинохайрхан дүүргийн нутаг дэвсгэр Авто сургуулийн замд эзэн холбогдогч нь тодорхойгүй зам тээврийн осол хэрэг гарчээ. Ослын улмаас 35 настай Э гэгч нь автомашинд дайрагдаж харамсалтайгаар амь нас нь хохирч, мөн гэрч нь худал мэдүүлэг өгч цагдаагийн алба хаагчийг төөрөгдүүлжээ. Тодруулбал, дуудлагын дагуу цагдаагийн алба хаагчдын осол хэргийн газар очиход  25 настай Б гэгч эмэгтэй гэрчийн мэдүүлэг өгсөн байна. Ингэхдээ “Тоёото Марк 2” цагаан өнгийн автомашин  энэ эмэгтэй хүнийг дайрчихаад хэргийн газрыг орхиод явсан гэх мэдээллийг өгчээ. Үүний дагуу замын цагдаагийнхан бүхий л  “марк II” автомашинуудыг эрэн сурвалжлах үйл ажиллагаа явуулсан байна. Улмаар замын хажууд байрлах камерийн бичлэгийг шүүж үзэхэд “Тоёото Марк II” биш “Прүсс” маркийн машин мөргөсөн нь тогтоогджээ. Ингээд шуурхай ажилласны үр дүнд тухайн гэрчийн мэдүүлэг өгч байсан эмэгтэй хүн уг хохирогчийг дайрсаныг тогтоожээ. Үүнийг дагуу уг автомашины жолоочийг саатуулан шалгаж байна. 

Хохирогчийн тухайд дайрагдсан газраа эмнэлгийн анхан шатны тусламж авч байгаад харамсалтайгаар амиа алдсан. Одоогийн байдлаар тухайн жолооч болон хохирогчоос согтуу байсан эсэхийг нь тогтоохоор шинжилгээнд явуулсан байгаа аж. Мөн гэрчүүдийн мэдээллээр гэр бүлийнх нь хүн, хохирогч эмэгтэй өөрөө согтуу байсан гэнэ.