-
2016 оны 8 сарын 01
Хилийн 0108 дугаар ангийг 90 жилийн ойг нь тохиолдуулан Монгол Улсын Ерөнхийлөгчийн зарлигаар Цэргийн гавьяаны одон хүртээлээ. Шагналыг Монгол Улсын Ерөнхийлөгчийн Тамгын газрын дарга П.Цагаан гардуулан өгөв. Тэрбээр баяр хүргэж хэлсэн үгэндээ
”Анх үүсч байгуулагдсан цагаасаа эхлэн улсын хил, хил орчмын дэглэмийг сахиулах үүргээ амжилттай биелүүлж, сая саяар тоологдох зорчигч, тээврийн хэрэгслийг улсын хилээр шалган нэвтрүүлэхдээ хууль бусаар хил нэвтрүүлэхийг завдсан олон удаагийн үйлдлийг илрүүлж, улс орны эдийн засагт учирч болзошгүй их хэмжээний бодит хохирлоос урьдчилан сэргийлсэн болон хариуцсан хэсгийнхээ хил хамгаалалтад сүүлийн үеийн техник, технологийн ололтыг нэвтрүүлж байгаа зэрэг амжилтуудыг ойн баярын энэ өдөр бахархан дурдахад таатай байна.
Улс орны газар нутаг торгон хилээс эхлэлтэй. Тэрхүү хил нь хилчин та бүхний өдөр шөнийн манааны үр дүнд амар амгалан байж, Монгол Улсын оршин тогтнохын үндэс, сүлдэт багана болж байдаг юм.
Иймд улсын хилийн халдашгүй дархан байдлыг сахин хамгаалж буй эрхэм хилчид та бүхэн цаашдаа хилийн бүс, зурваст амьдарч буй орон нутгийн ард иргэддээ нээлттэй байж, хил хамгаалалт, хилийн анги салбарынхаа туслах аж ахуйн шилдэг туршлагаа хуваалцдаг болох хэрэгтэй.
Төрийн дээд одонгоор шагнагдсан танай хамт олонд Монгол Улсын үндэсний аюулгүй байдлыг хангах, улсын хил хамгаалах албандаа өндөр амжилт гаргахыг хүсэн ерөөж, ойн баярын мэндийг дэвшүүлье” хэмээн амжилт хүсч, баяр хүргэлээ.
-
2016 оны 7 сарын 29
УИХ-ын Байгаль орчин, хүнс хөдөө аж ахуй болон УИХ-ын Эдийн засгийн байнгын хорооны хамтарсан хуралдаанаар Хүнс хөдөө аж ахуй, хөнгөн үйлдвэрийн сайдыг томилох тухай асуудлыг хэлэлцэж, П.Сэргэлэнг 95 хувийн саналаар дэмжлээ.
-
2016 оны 7 сарын 29
УИХ-ын чуулганы хуралдаан эхэлж хэлэлцэх асуудлаа баталлаа. Өнөөдрийн хуралдаанаар:
-
2016 оны 7 сарын 29
Монгол Улсын Их Хурлын дарга Миеэгомбын Энхболдод өнөөдөр /2016.07.29/ Монгол Улсын Ерөнхий сайд Ж.Эрдэнэбат Монгол Улсын Засгийн газрын зарим гишүүдийг томилох тухай Улсын Их Хурлын тогтоолын төслийг өргөн мэдүүллээ.
Монгол Улсын Үндсэн хуулийн Хорин тавдугаар зүйлийн 1 дэх хэсгийн 6 дахь заалт, Гучин есдүгээр зүйлийн 3 дахь хэсэг, Монгол Улсын Их Хурлын тухай хуулийн 14 дүгээр зүйлийн 14.3.6 дахь заалт, Монгол Улсын Их Хурлын чуулганы хуралдааны дэгийн тухай хуулийн 37 дугаар зүйлийн 37.7 дахь хэсэг, Монгол Улсын Засгийн газрын тухай хуулийн 21 дүгээр зүйлийн 1 дэх хэсэг, 23 дугаар зүйлийн 1 дэх хэсгийн 1 дэх заалт, Монгол Улсын Засгийн газрын бүрэлдэхүүний тухай хуулийг тус тус үндэслэн Монгол Улсын Ерөнхийлөгчтэй зөвшилцсөний үндсэн дээр Монгол Улсын Засгийн газрын дөрвөн гишүүнийг томилуулах асуудлыг Улсын Их Хуралд ийнхүү өргөн мэдүүлж буйгаа Ерөнхий сайд танилцуулав.
Монгол Улсын Засгийн газрын гишүүнээр томилуулах саналын үндэслэл нь Засгийн газраас дэвшүүлж байгаа зорилтуудыг биелүүлэхээр ажиллах болон танхимын зарчмаар ажиллах чадвар, тухайн ажил, үүргийг гүйцэтгүүлэхэд хуримтлуулсан туршлага, удирдан зохион байгуулах чадвар, ажил хэрэгч чанар зэрэг болохыг тогтоолын төсөлд дурдсан байна гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
-
2016 оны 7 сарын 29
МАН бүлэг дөрвөн сайдын асуудлаар хуралдаж, Эрчим хүчний сайдад нэр дэвшигч Т.Энхтайван нэрийг татах шийдвэр гаргажээ.
-
2016 оны 7 сарын 29
Мэргэжлийн Засгийн газар 13 яам, 16 сайд, 13 дэд сайд, 10 тохируулагч агентлаг, 17 хэрэгжүүлэгч агентлагтайгаар ажиллахаар бүтэц, бүрэлдэхүүнээ УИХ-аар батлуулсан.
-
2016 оны 7 сарын 29
Монголбанкны тэргүүн дэд захирал, дэд ерөнхийлөгчийг томилох эсэхийг өнөөдрийн байнгын хорооны хуралдаанаар хэлэлцэхээр болжээ.
-
2016 оны 7 сарын 29
УИХ-ын Эдийн засгийн байнгын хороо өнөөдөр хуралдаж дараах асуудлыг хэлэлцэхээр төлөвлөжээ.
-
2016 оны 7 сарын 29
Улсын Их Хурлын Нийгмийн бодлого, боловсрол, соёл, шинжлэх ухааны байнгын хорооны дарга Л.Энх-Амгалан, Улсын Их Хурлын гишүүн С.Чинзориг, Ц.Цогзолмаа нар эрүүл мэндийн чиглэлээр үйл ажиллагаа явуулдаг зарим төрийн бус байгууллагын төлөөлөл, эрдэмтэн судлаачдыг өнөөдөр /2016.07.28/ Төрийн ордонд хүлээн авч уулзаж, санал солилцлоо.
Элэг судлалын “Оном” сангийн ТУЗ-ийн дарга, доктор Д.Наранбаатар уулзалтын эхэнд хийсэн танилцуулгадаа манай улсын тухайд элэгний өвчлөл гамшгийн түвшинд хүрээд байгааг тодорхой баримтаар дурдав. Улсын хэмжээнд элэгний өвчний улмаас жилд 2800, өдөрт дунджаар 7 хүн нас барж байгаа бөгөөд энэ үзүүлэлт нь хүн амын нийт нас баралтын 15 хувийг дангаараа эзэлж байна. Эрдэмтдийн тооцоогоор 400 мянга хүн элэгний В, С вирусын халдвартай гэсэн судалгаа гарсан байдаг.
Харин сүүлийн үед манай эрүүл мэндийн салбарын эрдэмтэн судлаачид эдгээр вирусын эсрэг үйлчилгээтэй орчин үеийн эмчилгээний аргыг нэвтрүүлэхэд анхаарсны үр дүнд одоогоор 40 мянга орчим хүн элэгний вирус илрүүлэх шинжилгээнд хамрагдаад байгаа. Түүнчлэн 5000 хүн вирусын эсрэг эмчилгээнд орж, 4000 гаруй хүн эмчилгээг эхлүүлснээр бүрэн эдгэрэх боломжтой болсныг тэрээр дурдав.
Мөн тус төрийн бус байгууллага “Элэг бүтэн монгол хүн” хэлэлцүүлгийг зургаан удаа зохион байгуулж, элэгний өвчлөлийг бууруулах асуудалд анхаарч мөрийн хөтөлбөртөө тусгаж хэрэгжүүлэхийг улс төрийн намуудад уриалахад МАН энэ асуудалд ихээхэн анхааралтай хандаж сонгуулийн мөрийн хөтөлбөртөө тодорхой заалт оруулсанд баяртай байгаагаа илэрхийллээ.
Дараа нь уулзалтад оролцсон Монголын элэгний эмч нарын нийгэмлэгийн ерөнхийлөгч, доктор, профессор Я.Дагвадорж, тус нийгэмлэгийн дэд ерөнхийлөгч, доктор, дэд профессор Г.Зулхүү, нийгэмлэгийн Удирдах зөвлөлийн гишүүн, доктор, клиникийн профессор Д.Батдэлгэр, гүйцэтгэх захирал, доктор Д.Энхтүвшин, Өвчтөн, нийгмийн төлөөллийн зөвлөлийн Удирдах зөвлөлийн гишүүн Ч.Оюунчимэг, “Нэг монгол” төрийн бус байгууллагын гүйцэтгэх захирал Т.Гантогтох, “Оном” сангийн Урьдчилан сэргийлэлтийн багийн ахлагч Э.Эрдэнэбилэг нар саналаа хэлж, байр сууриа илэрхийлсэн юм.
Уулзалтын төгсгөлд Нийгмийн бодлого, боловсрол, соёл, шинжлэх ухааны байнгын хорооны дарга Л.Энх-Амгалан элэгний өвчлөлийн эсрэг санаа тавьж эх оронч санал, санаачлага гарган ажиллаж байгаа иргэний нийгмийн төлөөлөл, эрдэмтэн судлаачидтай өнөөдөр дэлхий нийтээр тэмдэглэж буй гепатитын өдөр уулзаж байгаадаа баяртай байгаагаа илэрхийлээд МАН-ын сонгуулийн мөрийн хөтөлбөрт элэгний халдварт В, С вирусын голомтыг бууруулах, цаашид бүрэн устгах тодорхой арга хэмжээ авч хэрэгжүүлэх, түүнчлэн өвчлөлийг эрт илрүүлэх оношилгоо, эмчилгээнд иргэн бүрийг хамруулах зорилт дэвшүүлсэн.
Иймээс “Элэг бүтэн монгол хүн” хөтөлбөрийг цаг алдалгүй хэрэгжүүлж эхлэх, энэ асуудалтай уялдуулан салбарын хууль эрх зүйн зохицуулалтыг улам боловсронгуй болгох, өнгөрсөн жилүүдэд батлагдсан эрүүл мэндийн салбарын хуулиудын хэрэгжилтэд хяналт тавихад тус байнгын хороо анхаарч, иргэний нийгмийн байгууллагууд, эрдэмтэн судлаачид, эрүүл мэндийн салбарын хамт олонтойгоо нягт хамтарч ажиллах болно гэдгийг онцоллоо гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.
-
2016 оны 7 сарын 28
МАН-ын Удирдах зөвлөл хуралдаж МАН-ын нарийн бичгийн дарга Д.Амарбаясгаланг Ерөнхий нарийн бичгийн даргын үүрэг гүйцэтгэгчээр томиллоо.
-
2016 оны 7 сарын 28
Монгол Улсын Их Хурлын дарга Миеэгомбын Энхболдод өнөөдөр \2016.07.28\ БНСУ-ын Үндэсний Ассамблейн Тамгын газрын Ерөнхий нарийн бичгийн дарга Ү Юүн Гын тэргүүтэй төлөөлөгчид бараалхав.
Уулзалтын эхэнд БНСУ-ын Үндэсний Ассамблейн Тамгын газрын Ерөнхий нарийн бичгийн дарга Ү Юүн Гын Улсын Их Хурлын даргыг цаг гарган хүлээн авч уулзаж буйд талархлаа илэрхийлээд АСЕМ-ийн Дээд түвшний 11 дүгээр уулзалтыг амжилттай зохион байгуулсанд баяр хүргэв. Мөн тэрээр, “Манай улсад ч гэсэн хоёр сарын өмнө сонгууль болсон. Монгол Ардын Намыг Улсын Их Хурлын сонгуульд ялалт байгуулсанд баяр хүргэе. Миний бие Улсын Их Хурлын Тамгын газрын Ерөнхий нарийн бичгийн дарга Ц.Цолмонгийн урилгаар Монгол Улсад ирж, санамж бичиг байгуулсандаа баяртай байна” хэмээгээд БНСУ-ын Үндэсний Ассамблейн дарга Жон Сэ Гюны Улсын Их Хурлын дарга М.Энхболдод баяр хүргэсэн илгээлтийг гардуулан өгөв.
Улсын Их Хурлын дарга М.Энхболд БНСУ-ын Үндэсний Ассамблейн Тамгын газрын Ерөнхий нарийн бичгийн дарга Ү Юүн Гын тэргүүтэй төлөөлөгчдийг Монгол Улсад тавтай зочлохыг хүсээд энэ сарын эхээр БНСУ-ын Ерөнхийлөгч Пак Гын Хэ Монгол Улсад албан ёсны айлчлал хийж, АСЕМ-ийн Дээд түвшний 11 дүгээр уулзалтад оролцсон нь АСЕМ-ийн арга хэмжээний ач холбогдлыг нэмэгдүүлэхэд чухал үүрэг гүйцэтгэснийг онцлон тэмдэглэв. Мөн тэрээр БНСУ-ын Үндэсний Ассамблейн дарга Жон Сэ Гюны илгээлтэд хариу талархал илэрхийлж буйг дамжуулахыг хүсэв.
Улсын Их Хурлын дарга М.Энхболд хэлсэн үгэндээ УИХ-ын сонгуулийн дүнгээр Монгол Ардын Нам олонхи болж, шинэ Засгийн газраа эмхлэн байгуулж байгааг дурдаад БНСУ-тай харилцах гадаад бодлого, үйл ажиллагаанд өөрчлөлт гарахгүйгээр тууштай үргэлжлэх болохыг онцлов.
Хоёр улсын харилцаа хамтын ажиллагаа эрчимтэй хөгжихийн зэрэгцээ парламент хоорондын хамтын ажиллагаа өргөжиж буйд Улсын Их Хурлын дарга сэтгэл хангалуун буйгаа илэрхийлээд хоёр улсын худалдаа, эдийн засгийн харилцааг улам өргөжүүлэх, эрх зүйн таатай орчныг бий болгож, дэмжлэг үзүүлэх нь парламентын үүрэг чухал болохыг хэлэв. Мөн хоёр парламентын Тамгын газар хоорондын хамтын ажиллагааг гүнзгийрүүлж, мэдээлэл солилцох, харилцан туршлага судлах чиглэлээр харилцаагаа бэхжүүлнэ гэдэгт итгэлтэй байгаагаа илэрхийлэв.
Уулзалтад Улсын Их Хурлын гишүүн, Төрийн байгуулалтын байнгын хорооны дарга Н.Энхболд, Улсын Их Хурлын Тамгын газрын Ерөнхий нарийн бичгийн дарга Ц.Цолмон, Улсын Их Хурлын Тамгын газрын Гадаад харилцааны хэлтсийн дарга Ц.Нарантунгалаг болон албаны бусад хүмүүс байлцав гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
-
2016 оны 7 сарын 28
МАН-ын Удирдах зөвлөл дөнгөж сая хуралдаж, дөрвөн сайдынхаа нэрийг баталсан байна.
-
2016 оны 7 сарын 28
Улсын Их Хурлын Тамгын газрын Ерөнхий нарийн бичгийн дарга Ц.Цолмон, БНСУ-ын Үндэсний Ассамблейн Тамгын газрын Ерөнхий нарийн бичгийн дарга Ү Юүн Гын нар өнөөдөр /2016.07.28/ Улсын Их Хурлын Тамгын газар болон Бүгд Найрамдах Солонгос Улсын Үндэсний Ассамблейн Тамгын газар хоорондын хамтын ажиллагааны протоколд гарын үсэг зурав.
Хамтын ажиллагааны протоколд гарын үсэг зурах арга хэмжээний дараа зочид, төлөөлөгчид БНСУ-ын Засгийн газрын буцалтгүй тусламжийн хүрээнд хэрэгжүүлсэн ”Цахим парламент” төсөлтэй танилцсан юм. Эхлээд Төрийн ордны зүүн жигүүрт байрлах парламентын сэтгүүлчдийн өрөө, техникийн удирдлагын төвөөр зочилж, дараа нь Улсын Их Хурлын чуулганы нэгдсэн хуралдааны танхим болон цахим системийн үйл ажиллагаатай танилцлаа.
Төслийн хүрээнд Улсын Их Хурлын чуулганы нэгдсэн хуралдааны танхим болон Байнгын хороодын хуралдааны танхимуудад техник, технологийн орчин үеийн ололтыг тусгасан программ хангамж, дуу, дүрсний систем бүхий хуралдааны иж бүрэн цахим системийг шинээр суурилуулсан юм. Тухайлбал, чуулганы нэгдсэн хуралдаан болон Байнгын хороодын хуралдаанд ашиглах Улсын Их Хурлын хуралдааны дэгийн тухай хуульд бүрэн нийцсэн программ хангамж, техникийн өндөр үзүүлэлт бүхий тоон системийн нийт 16 ширхэг камер, чадлын өсгөгч бүхий 18 ширхэг чанга яригч, дэлхийн олон орны парламентад ашиглагддаг 230 ширхэг микрофонт гар, чуулганы хуралдааны 5 танхимын дуу, дүрсний удирдлагын систем, чуулганы хуралдааны бие даасан сүлжээ, нөөцлөх төхөөрөмжүүд болон дагалдах техник хэрэгслүүдийг суурилуулсан аж. Эдгээр техник, тоног төхөөрөмжийг суурилуулснаар Улсын Их Хурлын чуулганы нэгдсэн хуралдаанд төдийгүй Байнгын, дэд, түр хороодын хуралдаанд цахим системийг ашиглах боломж бүрдэж байгаа аж.
Энэхүү төслийг хэрэгжүүлэх гэрээг анх 2012 онд үзэглэж, хугацаанаас нь нэг жилийн өмнө буюу 2014 оны 9 дүгээр сард амжилттай хэрэгжүүлж дуусгасан юм гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
-
2016 оны 7 сарын 28
Монгол Улсын Шадар сайд У.Хүрэлсүх өнөөдөр Бүгд Найрамдах Энэтхэг Улсаас Монгол Улсад суугаа Элчин сайд Суреш Бабуг хүлээн авч уулзлаа. Уулзалтын эхэнд Элчин сайд Суреш Бабу Шадар сайдыг хүлээн авч уулзаж байгаад талархаж буйгаа илэрхийлээд ардчилсан сонгуулийн дүнд Монгол Ардын Нам ялалт байгуулж, шинэ парламент, Засгийн газар бүрдсэнд баяр хүргэлээ.
-
2016 оны 7 сарын 28
Монгол Улсын Ерөнхий сайд Ж.Эрдэнэбатын тэргүүлсэн Засгийн газар анхдугаар хуралдаанаа 2016 оны 7 дугаар сарын 27-нд хийж, дараахь шийдвэрүүдийг гаргалаа.
-
2016 оны 7 сарын 28
УИХ-аас Засгийн газрын бүтэц, бүрэлдэхүүнийг шинэчлэн баталж, 13 яамтай ажиллуулахаар шийдвэрлэсний дагуу яамдын зохион байгуулалтын бүтэц болон орон тооны хязгаарыг шинэчлэн баталлаа.
-
2016 оны 7 сарын 28
УИХ-ын 2016 оны сонгуулийн дүнгээр байгуулсан, Монгол Улсын Ерөнхий сайд Ж.Эрдэнэбатын тэргүүлсэн Засгийн газар анхдугаар хуралдаанаа 2016 оны долдугаар сарын 27-ны өдөр хийлээ.
-
2016 оны 7 сарын 27
Улсын Их Хурлын гишүүн А.Ундраа өнөөдөр /2016.07.27/ Олон Улсын физикийн 47 дахь удаагийн олимпиадад эх орноо төлөөлөн амжилттай оролцсон сурагчдыг хүлээн авч уулзаж, баяр хүргэлээ.
Тус олимпиад энэ сарын 11-17-ны өдрүүдэд Швейцарийн Цюрих хотноо зохион байгуулагдсан бөгөөд 90 орны шилдэг 450 сурагч оюун ухаанаа сорьж, уралдсан байна.
Манай улсаас эх орноо төлөөлөн оролцсон Хасгэрэлийн Цэрэнчимэг мөнгөн медаль, Лхагвадоржийн Дөлгөөн, Луубаатарын Оюунтөгс, Эрдэнэчулууны Гарьд нар хүрэл медалийн эзэд болсон юм гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
-
2016 оны 7 сарын 27
Мэргэжлийн Засгийн газар анхны хуралдаанаа эхлүүлсэн талаар бид өмнө нь мэдээлсэн. Тус хуралдаанаар нийт долоон асуудал хэлэлцэж буй аж.
-
2016 оны 7 сарын 27
Улсын Их Хурлын Төрийн байгуулалтын байнгын хорооны дарга Н.Энхболд НҮБ-ын Хөгжлийн хөтөлбөрийн Монгол дахь Суурин зохицуулагч хатагтай Биате Транкманыг өнөөдөр /2016.07.27/ хүлээн авч уулзаж, хоёр талын хамтын ажиллагааны асуудлаар санал солилцов.
Уулзалтын эхэнд байнгын хорооны дарга Н.Энхболд НҮБ-ын Хөгжлийн хөтөлбөр нь өнгөрсөн жилүүдэд хууль тогтоох байгууллагын үйл ажиллагааны үр нөлөөг дээшлүүлэх, хуль тогтоох ажиллагаанд иргэдийн оролцоог хангах, нутгийн өөрөө удирдах байгууллага, түүний төлөөлөгчдийн чадавхийг бэхжүүлэх чиглэлээр Улсын Их Хуралтай хамтран тодорхой төсөл хэрэгжүүлж ирсэнд баяртай байгаа, энэхүү хамтын ажиллагааг цаашид үргэлжлүүлэх сонирхолтой байгаагаа илэрхийлэв.
Хатагтай Биате Транкман НҮБ-ын Хөгжлийн хөтөлбөр, Монгол Улсын Их Хурлын Тамгын газартай хамтран хэрэгжүүлж байгаа “Иргэдийн оролцоотой хууль тогтоох ажиллагааг дэмжих нь”, Монгол Улсын Их Хурал, Швейцарын Хөгжлийн агентлаг, НҮБ-ын Хөгжлийн хөтөлбөрийн хамтран хэрэгжүүлж байгаа “Нутгийн өөрөө удирдах байгууллагын чадавхийг бэхжүүлэх нь” төслүүдийн хэрэгжилтийн явц, үр дүнгийн талаар Байнгын хорооны даргад мэдээлэл өгөв.
Дээрх төсөл нь Улсын Их Хуралд бодлогын судалгаа хийх, оролцогч талуудтай нээлттэй зөвлөлдөх замаар хууль боловсруулах ажиллагааг сайжруулах; иргэд ба сонгогдсон төлөөлөгчид хоорондын харилцааг бэхжүүлэх; НҮБ-ын Авлигын эсрэг конвенцийн тайланг гаргах, хэрэгжүүлэх ажиллагаа, ёс зүй ба сонирхлын зөрчилтэй холбоотой бодлого, хууль тогтоомжийн хэрэгжилтийг сайжруулахад туслалцаа үзүүлэхэд чиглэгджээ. Мөн Улсын Их Хурал, Швейцарын Хөгжлийн агентлаг, НҮБ-ын Хөгжлийн хөтөлбөрийн хамтран хэрэгжүүлж байгаа “Нутгийн өөрөө удирдах байгууллагын чадавхийг бэхжүүлэх нь” төслийг амжилттай хэрэгжүүлж иржээ. Эдгээр төсөл нь энэ оны сүүлчээр хэрэгжиж дуусах юм.
Иймээс дээрх хоёр төслийн хүрээнд бий болгосон үр дүнг бэхжүүлэх, үндэсний тогтвортой механизм бий болгох зорилгоор “Төлөөллийн байгууллагын чадавхийг бэхжүүлэх нь” төслийг хэрэгжүүлэхээр баримт бичгүүдийг боловсруулаад байгаа юм байна. Уг төслийг 2017-2020 онд хэрэгжүүлэхээр төлөвлөж байгаа аж. Төслийн хамрах хүрээ нь үндэсний хэмжээнд буюу бүх аймаг, сум, нийслэл, дүүргийн ИТХ, баг, хорооны Нийтийн хурал, Улсын Их Хурлын Тамгын газар бөгөөд хэрэгжүүлэгч байгууллага нь Улсын Их Хурлын Тамгын газар байх юм байна.
Түүнчлэн төрийн албаны мэргэшсэн байдлыг хангах хууль эрх зүйн болон бодлогын орчинг бэхжүүүлэх, төрийн албан хаагчдын мэргэжлийн чадавхийг сайжруулах, төрийн захиргаан дахь жендэрийн тэгш байдлыг нэмэгдүүлэх, төрийн байгууллагуудын ажлыг үнэлэх иргэн төвтэй тогтолцоо бүрдүүлэх зорилтын үүднээс “Мэргэшсэн, иргэн төвтэй төрийн албыг бэхжүүлэх нь” төслийг хамтран хэрэгжүүлэхээр төлөвлөжээ. Эдгээр төслийг боловсруулах явцад зүүн 5 аймаг, нийслэлийн дүүргүүдийн ИТХ-ын төлөөлөл, 8 аймгийн ИТХ-ын нарийн бичгийн дарга нар, иргэний нийгмийн байгууллагуудын төлөөлөлтэй төслийн хэрэгцээ, хэрэгжүүлэх үйл ажиллагааны талаар санал солилцсон байна.
Байнгын хорооны дарга Н.Энхболд, Суурийн төлөөлөгч хатагтай Биате Транкман нар уулзалтын үеэр дээрх төслүүдийн баримт бичгийн боловсруулалтын явц, хэрэгжүүлэх арга зам, төслийг үр өгөөжтэй байлгахад хоёр талаас анхаарах асуудал болон НҮБ-ын Тогтвортой хөгжлийн зорилтууд, Монгол Улсын Тогтвортой хөгжлийн үзэл баримтлал-2030 бодлогын баримт бичгүүдийг хэрэгжүүлэхэд хамтран ажиллах талаар санал солилцов. Түүнчлэн Тогтвортой хөгжлийн зорилтуудын хэрэгжилтийг хянах тоо баримт, шалгуур үзүүлэлтийг бүрдүүлэх, хийх ажлыг жил, жилээр хувааж тодотгох, салбар хоорондын болон төв, орон нутгийн уялдааг хангах, хөгжлийн санхүүжилтийг үр дүнтэй нь уях чиглэлээр тодорхой ажил хийгдэж байгаа талаар ярилцлаа гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.
