Сүүлийн үед хүүхэд зам тээврийн осол, хэрэгт өртөж амь насаа алдах, гэмтэх нь ихэсчээ. Иймд Замын цагдаагийн газар, ЗГХА-Хүүхдийн төлөө газар, УБ хотын Замын хөдөлгөөний удирдлагын төв, Нийслэлийн Хүүхдийн төлөө газар, Монголын Эрүүл Мэндийн Мэргэжилтнүүдийн Нийгэмлэг ТББ-ууд хамтран жолооны курсын сургалтын хөтөлбөрийг хүний аюулгүй байдлыг хамгаалах асуудлаар жолооны курсын удирдах ажилтнуудтай хамтран хэлэлцүүлэг зохион байгуулах гэж байна.

Тайландын ерөнхий сайд Инглак Чинават өнөө өглөө хоолны хордлого авч Бангкокийн нэгэн эмнэлэгт хүргэгдсэн талаар “Agence France-Presse” агентлаг саяхан мэдээлэв. Засгийн газрын хэвлэл мэдээллийн алба үүнийг нотолсон боловч ерөнхий сайдын биеийн байдал ямар байгаа талаар тодорхой мэдээлсэнгүй, харин өнөөдрийн Засгийн газрын хуралдааныг ерөнхий сайдын орлогч даргална гэдгийг л мэдэгджээ.

Өнгөрсөн 19-ний өдөр Оюутолгойн кэмпэд сэжигтэйгээр нас барсан монгол залууг цагдаагийнхан амиа хорлосон гэж урьдчилан байдлаар үзэж байгаа ч ар гэрийнхэн нь үүнд эргэлзэж байгаагаа дахин нотлов. Талийгаачийн ахын ярьсанаар бол эмгэнэлт явдал болсоны дараа анх очсон хүмүүсийн үзсэн байдал амиа хорлосон гэхээргүй байсан гэнэ.

Өвөр Монголын Баруун үзэмчин хошууны монгол үндэстний нэгдүгээр бага сургуульд монгол шатрын тэмцээн зохиогдов. Монгол үндэстний нэгдүгээр бага сургууль нь 1980 онд байгуулагдсан, дан монгол хэлээр хичээллэдэг ӨМӨЗО-ны цөөхөн сургуулийн нэг юм.

Сирийн ерөнхийлөгч Башар ал-Ассадыг эсэргүүцсэн иргэдийнхээ эсрэг хүч хэрэглэж буй тус улсын Засгийн газар 250 гаруй хүүхдийн аминд хүрээд байгааг НҮБ-аас мэдэгдлээ. Башар ал-Ассадын зэвсэггүй иргэдэд хэрхэн зэрлэгээр хандаж байгаа тухай 39 хуудас материал цугларчээ.

Монголд Санхүүгийн тагнуулын алба гэдэг байгууллага бий болоод таван жил болжээ. Албаны таван жилийн ойг тохиолдуулан өнөөдөр гаргасан мэндчилгээгээрээ Монголбанкны санхүүгийн мэдээллийн албаны дарга Б.Төмөрбат үүнийг Монголын олон нийтэд анх удаа мэдэгдэв.

Өнгөрсөн долоо хоногийн лхагва гарагийн орой МАН-ын шинэ байрны дөрөвдүгээр давхраас унаж бэртсэн “Өндөр Буянт” компанийн ажилтан А.Даваадоржийн бие сайнгүй байна. Тэрбээр бэртсэн өдрөөсөө хойш Гэмтэл согог судлалын үндэсний төвд хэвтэж, эмийн эмчилгээ хийлгэж байгаа аж. А.Даваадорж өндрөөс унасны улмаас тархиндаа хүчтэй гэмтэл авч, толгойн арын хэсгийн зарим яс, мөн бөөр нь бяцарсан байна.

Хоёр бөхтэй монгол тэмээг өвөр монголчууд Гиннесийн номонд бүртгүүллээ. Тэд хоёр бөхтэй тэмээний хамгийн том уралдаан зохион байгуулсан гэнэ. Үүнд нийт 555 тэмээ орсон бөгөөд таван км зайд элсэн дундуур уралджээ. Хоёр бөхтэй тэмээ дэлхийд 1.4 сая байдаг гэсэн судалгааг дэлхийн мэдээллийн хэрэгслүүд цацаж байгаа юм. Эдгээрээс 265 мянга нь манай улсад байгааг 2010 оны мал тооллогоор тогтоожээ.

Төрийн албаны мэргэшлийн шалгалтыг хөдөө орон нутагт цахим хэлбэрээр авах боломжийг бүрдүүлж байгаа гэнэ. Энэ төрлийн шалгалтыг нийслэлд өнгөрсөн сарын 21-нд анх удаа авч байсан аж. Үүний тулд тусдаа өрөө, интернэт сүлжээнд холбогдсон 20-40 ширхэг компьютер зэрэг хэд хэдэн зүйл шаардлагатай юм.