БНХАУ-ын Соёлын яам өчигдөр Жансү мужийн Чаншү хотод 2011-2013 оны “Хятадын ардын соёл урлагийн өлгий”-г бүртгэн жагсааж баяр ёслолын байдалтайгаар зарлав. Жагсаалтад бүх Хятадын 258 орон нутаг, түүний өвөрмөц соёлыг “Хятадын ардын соёл урлагийн өлгий” хэмээн үнэлэхэд үүнд Өвөр Монголын 10 орон нутаг өөрийн соёлын хамтаар багтсан байна

Шотланд дахь Монголын өргөмжит консул Дэвид Скотт ирэх нэгдүгээр сард Шотландын 15 компанийн төлөөлөгчийг Монголд авчрах гэж байна. Адал явдалт аяллын бизнес эрхэлдэг Д.Скотт өнгөрсөн 11 дүгээр сард өргөмжит консул болсон бөгөөд түүний зохион байгуулж буй энэ айлчлал нь Шотландаас Монголд хийж буй бизнесийнхний анхны танилцах аялал болох юм.

Монголын хөгжмийн зохиолчдын мэргэжлийн хөгжмийн 12 бүтээлийг улсын санд худалдан авлаа. БСШУ-ы сайдын тушаалаар байгуулсан хөгжмийн судлаач, удирдаачдын бүрэлдэхүүнтэй комисс өнгөрсөн долоо хоногт хуралдаж улсын хөрөнгөөр худалдан авах бүтээлүүдийг сонгожээ.

Хөгжлийн банкинд 20 сая ам.долларын хямд өртөгтэй зээл ING олон улсын байгууллагаас орж ирээд байна. Энэ нь олон улсын санхүүгийн зах зээлд арилжаалах нийт 600 сая ам.долларын өрийн бичгийн эхлэл болж байгаа аж. Хөгжлийн банкинд орж ирж буй дээрх төсвийг зарцуулах төлөвлөгөөг гаргажээ.

Ерөнхийлөгч Ц.Элбэгдорж НҮБ-ын Соёл иргэншлийн холбооны дөрөвдүгээр чуулга уулзалтад оролцох үеэрээ Австри болон ХБНГУ-ын ерөнхийлөгчтэй уулзлаа. Тэрбээр уулзалтын үеэр боловсрол, мэргэжилтэн бэлтгэх асуудлыг чухалчлан хэлж байсан юм.

Албан үүргээ гүйцэтгэж яваад амь насаа алдсан цагдаагийн албан хаагчдын дурсгалыг хүндэтгэх “Бид мартахгүй” өдөрлөг арга хэмжээ өнөөдөр болно. Энэ арга хэмжээний үеэр тэдний гэр бүлийнхэнтэй уулзалт ярилцлага өрнүүлж, дурсамжаа сэргээн ярилцдаг аж. Мөн залуу албан хаагчдад эрэлхэг цагдаа нарыг танилцуулах ач холбогдолтой үйл явдал болдог байна.

Оросын тэрбумтан Михайл Прокоров ирэх жилийн ерөнхийлөгчийн сонгуульд нэр дэвшиж, В.Путинтай өрсөлдөнө гэдгээ өчигдөр албан ёсоор мэдэгдлээ. Тэрбээр “New Jersey Nets” багийн эзэн, 18 тэрбум долларын хөрөнгөөрөө дэлхийд дээгүүрт бичигддэг бизнесмэн юм.

Өнөөдөр нутгийн зүүн хэсэгт солигдмол үүлтэй бага зэргийн цас орно. Бусад газраар багавтар үүлтэй, хур тунадасгүй. Өнөөдрөөс хүйтэрч Дархадын хотгор болон Хөвсгөл, хангайн уулс мөн Идэр, Тэс голын саваар 24-29 хэм хүйтэн. Хэнтийн уулс, Орхон, Хараа, Ерөө, Туул, Хэрлэн голын саваар20-25 хэм хүйтэн байна.

Юмыг сайнаар ч, муугаар ч өөрчилж болдог билээ л. УИХ-ын дарга алх товшиж, энэ хууль батлагдсан л бол хамгийн эхэнд үүсэх асуудал нь төрийн албан хаагчид сонгуульд нэр дэвшээд ялалт байгуулахгүй л бол ажилгүй болох зовлон үүсэв. Нэр дэвшигчид орон даяар сонгууль эхлэхээс зургаан сарын өмнө буюу шинэ он гарахаас урьтаж өөр нэгэнд ажлаа хүлээлгэж өгөөд, ажилгүйчүүдийн эгнээнд хагас жил сууна гэсэн үг.