Олон улсын мэдээллийн “Reuters”, “Associated Press” агентлагууд ӨАБНУ-ын ерөнхийлөгч асан Нельсон Манделагийн гэрийг нууц камер ашиглан зургаан жилийн турш тагнаж байжээ. Энэ талаар ӨАБНУ-ын хэвлэлд бичсэнийг үзвэл Н.Манделатай хөрш суудаг орон нутгийн нэгэн томоохон омгийн ахлагч Нокванеле Бализулугийн байшингийн хананд уг камеруудыг байрлуулсан байна.

Оросын “Газпром” банк Сергей Паушокоос 25 сая доллар нэхэмжлэн шүүхэд хандсаныг Москва хотын дүүргийн шүүх өчигдөр хүлээн авч хэлэлцээд нэхэмжлэл нь хууль зүйн бүрэн үндэстэй болохыг тогтоосон шийдвэр гаргалаа. Сергей Паушок “Алтан Дорнод Монгол” компанийн эзэн байхдаа уг компанийн нэрээр 2008 оны хоёрдугаар сард “Газпром” банкнаас 16.5 сая долларын зээл авчээ.

М.И.Глинкийн нэрэмжит олон улсын дуурийн дуулаачдын уралдааны эрэгтэйчүүдийн төрөлд тэргүүн байруудыг эзэлсэн Г.Ариунбаатар, Э.Анхбаяр нар өнөө өглөө эх орондоо иржээ. Амжилтаар дүүрэн ирсэн уран бүтээлчдийг цагдаагийн “Сүлд” чуулгынхан угтаж авсан байна. Мөн гэр бүл, найз нөхөд нь баярлан угтсан гэнэ.

Холливүүдийн алдартай залуу жүжигчдийн нэг Эван МакГрэгор 2004 онд найз жүжигчин Чарльз Бурман болон хоёр зураглаачийн хамтаар дэлхийг тойрсон аялал хийж мотоциклоор 31000 км зам туулсан билээ

Өнгөрсөн сарын 23, 24-ний өдөр Нийслэлийн хүүхдийн төлөө газар, Цагдаагийн газар, Эрүүл мэндийн газар, Хаяг тогтоох төв хараа хяналтгүй 157 хүүхдийг илрүүлж, 111-ийг нь гэр бүлд нь хүлээлгэн өгчээ. Нийт хүүхдийг эрүүл мэндийн шинжилгээнд хамруулж, бүртгэлжүүлсэн бөгөөд ажлын үр дүнг саяхан танилцуулсан байна. Хараа хяналтаас гадуур байсан хүүхдүүүдийн 152 нь долоогоос дээш насныхан байжээ.

Өнөөдөр УИХ-ын нэгдсэн чуулганаар 10 асуудлыг хэлэлцэхээр төлөвлөжээ. УИХ-ын гишүүн Э.Бат-Үүлийн танилцуулах “Засгийн газрын агентлагийн эрх зүйн байдлын тухай хуульд нэмэлт оруулах тухай хуулийн төсөл”-өөр чуулган эхэлнэ. Үүний дараа ХХААХҮ-ийн сайд Т.Бадамжунай “Үндэсний үйлдвэрлэлийг дэмжих УИХ-ын тогтоолын төсөлд өөрчлөлт оруулах төсөл” танилцуулах юм.

Өнөөдөр баруун аймгуудаар үүлшиж, бага зэргийн цас орно. Бусад газарт багавтар үүлтэй, цас орохгүй. Дархадын хотгор, Идэр, Тэс голын саваар 29-34 хэм хүйтэн байна. Увс нуурын хотгор, Хэнтий, Хөвсгөл, хангайн уулс болон Орхон, Хараа, Ерөө, Туул, Хэрлэн, Онон, Халх голын саваар 20-25 хэм хүйтэн байх юм.

Нью-Йоркийн олон улсын кино наадмын шилдэг бүтээлээр шалгарсан найруулагч Г.Золжаргалын “Тайгын дууч” киноны гол дүр, Хөвсгөл аймгийн Улаан-Уул сумын клубын дархад дууны багш Н.Цогбадрахтай утсаар холбоо барилаа. Гол дүрийг нь бүтээсэн кино нь олон улсын наадамд түрүүлж, өөрөө дэлхийн танил болсоноо тэрбээр мэдээгүй яваа ажээ.

Хятад улс 2015 он хүртэл нарны эрчим хүчний үйлдвэрлэлээ нэмэгдүүлэх асуудлыг бодит төлөвлөгөө болголоо. Дөрвөн жилийн дараа нарны эрчим хүчний үйлдвэрлэлээ 50 хувиар өсгөхөөр төлөвлөснөө Эрчим хүчний үндэсний газар нь өнөөдөр мэдэгдэв. Нарнаас гаргах цахилгааныг 15 гвт хүргэх бол салхин эрчим хүчийг 100 гвт болгохоор Засгийн газар нь шинэчилсэн төлөвлөгөөндөө тусгажээ.